【閒言閒語】又見4/5D，Yeah！

如果一個老師只係為名、為利、為咗將工作生活上嘅失意同委屈發泄在學生身上而教書，咁教書大概比唔到幸福佢。

而家嘅教育制度強調成本效益、「目標」為本。係呢個意義下，我教書從來無咩目標。勉強要講嘅，只係：盡量唔好教錯嘢(無錯，邊有得話保證唔會錯架…..最多認同改架啫 ─ 只限教書…..)；唔好令學生對自己教嘅科目失去興趣；留意學生有咩問題，發現有就「不嫌己煩」提點兩句(我嘅句子，無錯，係比一般人長些少嘅……)；有需要嘅時候遞下紙巾跑下腿(或者再講多兩句)……呢啲係我控制範圍以內嘅嘢。

至於控制唔到嘅願望，就包括：同學唔好自私自利─因為咁通常害己害人；要明辨是非，唔好作奸犯科；不需要─甚至唔好─辛苦自己做其他人心目中嘅成功人士，但做到自己想做嘅嘢；身體健康；生活得不一定要成日傻笑果隻開心，但要幸福同有意義。

而我屈藏心底、最最自私暗黑嘅奢望，就係：大家開心或者唔開心嘅時候，居然會省起有個正經嘢通常唔做、但又好鬼長氣、仲成日好唔知醜要痴玩痴食嘅阿SIR，同佢分享下近況、甚至比機會佢請下大家飲茶。

尋晚非常非常開心，因為執教鞭以來至鍾意嘅一班同學居然邀請我去參加大家嘅放題飯聚！😍😍😍😍😍😍！！！多謝大家！！！！

今朝醒來，肚內的魚生猶在消化，心裡的興奮仍舊翻騰，遂為此文、並post舊文以記之。

(其實我邊忍得！篇嘢本來係尋晚坐車返屋企途中打嘅，點知啱啱打完，唔知邊個回覆我交友邀請嘅時候我唔知做錯啲咩嘢，成篇無哂……😢😢😢😢😢😢)

而續集快將推出.......