Saturday, March 04, 2006

【故事】七十一



圖:大哥強




大哥強:
果然君無戲言
謝主龍恩呀! @^_^@







七叔雙手輕按身前的收銀機 , 雙眼定定看著牆上的鐘。鐘正讀著三時二十七分 , 口中唸的卻是 :「七月十一…」

「渴死人啦!」
「半夜三更…咦 , 果邊有間Seven , 不如買杯汽水好唔好 ?」
「爽哂 ! 『七十一 , 梗有一間0係左近….』…哎呀…唔好意思!」
「唔緊要。」易莉芬對正在賠罪的金髮少年報以諒解一笑 , 便推開了便利店的大門。

「易小姐 , 又咁夜呀 !」七叔向剛進門的莉芬熱情招呼。
「係呀 ,又係一個人看舖 ?」莉芬四周打量 , 然後視線落在收銀機旁的架子上 , 隨手拿了一排巧克力。
「請你飲0既。」七叔慢慢回過身來 ,邊點頭邊用一杯特大號的汽水換了莉芬手上的巧克力。
「多謝 !」莉芬輕輕啜了一口 ,把杯子擱在收銀機旁 , 飲管頂端留下淡淡的一抹紅。

打從十天前開始 ,莉芬每晚都在這個時分來這間便利店 , 買一罐果汁或一包糖果甚麼的。當她知道了七叔晚上只是一個人孤伶伶地看舖之後 , 總會趁付款時和他聊天 , 談談他的工作。七叔也樂得有人跟他消磨這深宵的寂寞 , 還每晚請她喝一杯大汽水。

「今晚特大喎 ! 」
「當慶祝囉 , 今晚係我最後一晚開工。」
「哦 ? 乜你唔做0拿 ? 」莉芬顯得有點意外。
「係呀。老細0岩0岩話會有一個新人0黎代我 , 都做0左十幾年…盛惠十三個八。」七叔邊說邊把銀碼打進收銀機。
「唔知個新人點呢 ? …」莉芬心不在焉的從手袋裡拿出一個錢包。
「好似係個同你差唔多0既後生靚女…」
「弊 ! 唔好意思 , 七叔 , 我銀包唔夠錢。我出去一陣 , 好快返 !」莉芬笑著衝出門口。
「唔駛急嘛…唉…」

「翻0黎0拿 , 搵唔搵到…」七叔向剛進門的莉芬招呼。
「搵到 !」莉芬大步走向收銀處的同時輕輕拭去額上汗珠 , 雙眼竟似迸發著掩不住的興奮。她將手袋平放在收銀機旁 , 緩緩地從袋中拿出一柄發亮的牛肉刀。
「七叔 , 我絕對無心傷害你。勞煩你將收銀機D錢放哂入袋。」
「唉…咁又何必呢…比差人拉到就…」七叔似乎不擔心自己的安全 , 反倒替莉芬著緊。
「放心 , 我0黎0左呢度十晚 , 已經摸清哂附近0既環境。呢個時間根本極少有人出沒 ,而差人每晚兩點半巡完呢條街之後 , 起碼要四點半先會再行過。頭先我出去已經check過哂 , 鬼影都無隻。」莉芬滿有信心的向七叔嫣然一笑。
「咁…你要就自己0黎 , 唔關我事。」七叔逕自走了出櫃檯。
莉芬略一猶疑 , 終於還是繞到收銀機前。
「咪亂0黎。」
當她的左手拉開收銀機那盛滿紙幣和硬幣的盤子時 , 似乎聽到了一下古怪的笑聲。她心底一寒 , 立時抬頭望向七叔。
「唔係我 , 係你老細。」七叔邊搖頭邊走向大門。
「十一年前我打劫呢間舖 , 開機攞錢果時, 一樣比老細嚇餐懵…..」七叔頓了一頓,回頭望了望收銀機,繼續邊走邊說。「唔駛驚 , 佢無乜點0既 , 係鍾意有人對住佢 , 得閒同佢傾0下偈就得0架0勒…」
莉芬駭然驚覺自己怎麼也走不出櫃檯的範圍。
「呀, 差D唔記得…」七叔在走出大門前回首向莉芬帶點鼓勵意味的笑了笑。
「下次0黎打劫你果個就會代替你看舖…放心啦! 我諗唔會好耐0既..依家D後生仔…」

莉芬木然跪下 , 抬頭見到的 ,彷彿只有那咧嘴而笑的收銀機。