【閒言閒語】《從【從記號學觀點看維根斯坦《哲學研究》】看哲學系同學的日常生活》

呢個經典: Chong-Fuk Lau Zoe Hung Henry Li Siufu Tang Fy Koon Andy Chui

http://humanum.arts.cuhk.edu.hk/~hhho/phi5090_96/index.html

猶記得 ---

1) 呢堂上堂嘅方式如下：何生先講半個鐘至9個字記號學，咩「大語言」、「小語言」，然後由同學報告，跟住大家*一齊討論。

*「大家」係唔包何生嘅。。。。

2) 終於，喺個課過咗一半之後嘅某一堂，當何生講完啲「情感」、「記號」之後循例問大家有咩問題並已準備好無人會問嘅時候，充滿學習熱誠與疑惑嘅倪康同學（唔該搵人幫手tag tag 佢）問咗何生呢個驚天地泣鬼神嘅問題:「何生，究竟記號學同維根斯坦……實際上有咩關係呢？」當時所有同學皆驀然被呢個對存在意義嘅基本扣問所喚醒，並且不約而同先望向倪同學（而我當時心中不期然出現咗應該大家都同時不能自控地湧上心頭嘅三個字：「梗係無……」），再望向何生！呢個時候，何生笑而不語，微微頷首 。。。良久，笑容依舊，輕輕向眾人道：「好，還有沒有其他問題?」

3) 每次何生講完記號學部分時都會有個break，呢個時候，同學們固然會稍事歇息，小虎亦會從衫袋攞出一條長約半尺，色澤淡黃嘅牛奶蛇（小虎有錯勞煩更正）喺手中把玩，整個課室霎時間充斥大自然的和諧與生命力。

4) 支持大家每個星期五八點半晨咁早喺聯合上堂嘅動力，就係11點落堂後我地大部分同學都會落嶺南踢波（呢個亦係哲學系逢星期五周會時間踢波呢個傳統--其後由蛋治 Frankie Wong承繼--嘅由來）。

5)最後一堂，原定阿航10點半嚟做課檢。由於係最後一堂，何生呢日一反傳統，一開始第一句就問大家對個課有無咩問題，而今次連倪同學都無再提問（可見佢真係從呢個課有所得著。。。。）。又良久，大概8點50分，何生又係面帶温暖笑意宣佈：「好，下課！」大家還未回過神來，何生已騎鶴飛去。「咁課檢………」
呢個時候 -- 應該係我 -- 用粉筆喺黑板寫住：「蘇小姐，如要做課檢，請到嶺南場」。大概10點50分左右，阿航上氣唔接下氣咁走入嶺南場，而我地都好合作咁幫佢填好份問卷。。。。

~ 完 ~